Муассиса аз соли 1927 фаъолият намуда, ҳамчун Озмоишгоҳи ветеринарии Сталинобод таъсис дода шудааст ва соли 1931 ҳамчун Институти илмӣ-тадқиқотӣ эксперименталии ветеринарӣ номгӯзорӣ гардидааст.

Сипас соли 1932 Стансияи илмӣ-тадқиқотии ветеринарии минтақавӣ ва соли 1933 аз нав ба Озмоишгоҳи ветеринарии бактериологии Сталинобод номгӯзорӣ шуд.

Соли 1943 дар заминаи озмоишгоҳ Стансияи таҷрибавии илмӣ-тадқиқотии ветеринарӣ таъсис дода шуда, соли 1956 ба ҳайати Академияи илмҳои РСС Тоҷикистон дохил гардида, Институти илмӣ-тадқиқотии чорводорӣ ва ветеринарӣ таъсис дода шуд.

Соли 1961 Институти илмӣ-тадқиқотии ветеринарӣ аз Институти чорводорӣ ҷудо гардида, Институти илмӣ-тадқиқотии ветеринарии Тоҷикистон номгузорӣ карда шуд.

Институти ветеринарӣ, дар асоси қарори Совети Вазирони РСС Тоҷикистон аз 24 апрели соли 1961 таҳти рақами №163 ташкил карда шуда, дар зери итоати бевоситаи Академияи илмҳои кишоварзии Тоҷикистон мебошад. Аз 02 майи соли 2008, бо қарори Ҳукумати Ҷумҳурии Тоҷикистон таҳти № 215 номи Институти илмӣ-таҳқиқотии ветеринарӣ ба Институти ветеринарии Академияи илмҳои кишоварзии Тоҷикистон ва аз 31 августи соли 2020, №487 ҳамчун Институти тибби ветеринарии Академияи илмҳои кишоварзии Тоҷикистон номгузорӣ карда шуд. Институти тибби ветеринарии АИКТ дорои “Шаҳодатнома” буда, дар асоси “Оиннома” фаъолият менамояд.