Татбиқи дастовардҳо
Дар натиҷаи гузаронидани корҳои илмию тадқиқотӣ оид ба ташхис, пешгирӣ ва муолиҷаи бемориҳои сироятии чорвои кишоварзӣ — сил, брутселлёз, гули бузҳо ва дигар зоонозҳо; бемориҳои сироятии паранда — бемории Нюкасл ва пастереллёз; бемориҳои занбӯри асал – пӯсиши аврупоӣ ва амрикоӣ; касалиҳои бактериявии моҳиҳо — аэромоноз ва псевдомоноз; бемориҳои инвазионии чорвои кишоварзӣ, тарҳрезии маводи самараноки микробиологӣ ва кимиёвӣ бар зидди барангезандагони бемориовари ҷавонаҳои чорвои кишоварзӣ ва ғайра олимони Институти тибби ветеринарии АИКТ дар даврони Истиқлоли давлатии Ҷумҳурии Тоҷикистон ба як қатор дастовардҳо ноил гаштанд.
Дар рафти иҷрои корҳои илмию тадқиқотӣ олимони институт бо дар назардошти тарҳрезии маводу усулҳои нав ва дар истеҳсолот ҷорӣ намудани ихтироот аз ҷониби Маркази миллии патенту иттилоот зиёда аз 60 патент оид ба ихтироъ аз қабили: «Тарзи якҷоя эмгузаронии гӯсфандон бар зидди брутселлёз ва вабои сумдард», №ТJ 744, “Тарзи комплексии иммунизатсияи бузу гӯсфандон бар зидди касалиҳои гули бузҳо ва гули гусфандон, салмонеллёз ва пастереллёз” №TJ 1121, “Таркиби дорои таъсири акарисидӣ нисбати канаҳои ҳайвонот”, № TJ838 ва ғайра, ки аз натиҷаи он олимон сазовори медали тиллои марказ гардидаанд ва инчунин ба гирифтани 4 пешниҳоди беҳсозӣ муяссар гардиданд.
Диаграммаи тарҳрезии патент ва ҳуҷҷатҳои меъёрию техникӣ
дар Институти тибби ветеринарии АИКТ
Ҳамзамон дар баробари гузаронидани корҳои илмию таҳқиқотӣ ҷиҳати пешгирӣ намудани касалиҳои сироятии чорвои кишоварзӣ олимон 31 намуди ваксинаҳо ва доруҳои кимиётерапевтӣ ихтироъ намудаанд, ки қисми зиёди онҳо дар истеҳсолот истифода гашта истодаанд, ба монанди ваксина аз антигени протективӣ, ваксинаи асотсиатсиякардашуда ба муқобили салмонелёз ва пастереллёзи чорвои кишоварзӣ, ваксина бар зидди пастереллёзи чорвои кишоварзӣ, ваксина бар зидди колибактериоз ва пастереллёзи чорвои кишоварзӣ, ваксина бар зидди салмонеллёзи чорвои кишоварзӣ.
Инчунин барои муолиҷаи касалиҳои сироятӣ ва ғайрисироятии чорвои кишоварзӣ ва паранда олимон дар натиҷаи гузаронидани корҳои илмию таҳқиқотӣ маводи табобатӣ – Субтилбен, Монесид, Албсинкат, Намитаб – С, Витагин, шаробаи чемеритса ва ғайра коркард намудаанд, ки дар хоҷагиҳои чорводории ҷумҳурӣ васеъ истифода шуда истодаанд.
Дар давраи Истиқлоли давлатии Ҷумҳурии Тоҷикистон аз ҳисоби кормандони Институти тибби ветеринарӣ 21 рисолаи номзадӣ ва 16 рисолаи докторӣ ҳимоя карда шуда, 3 рисолаи докторӣ ва 5 рисолаи номзадӣ омодаи дифоъ мебошанд.
То ин давра олимони Институти тибби ветеринарӣ аз Маркази миллии патенту иттилооти Вазорати рушди иқтисод ва савдои Ҷумҳурии Тоҷикистон 60 патент оид ба ихтироъ ва 2 қарори мусбӣ гирифтанд. Дар баробари ин 5 пешниҳоди беҳсозӣ низ гирифта шудааст.
Оид ба омода ва ба нашр баровардани дастуру тавсиянома оид ба ташхис, пешгирӣ ва табобати бемориҳои чорвои кишоварзӣ олимони институт 11 китоб, 102 дастур ва 16 тавсиянома аз чоп бароварданд. Ҳамзамон 40 ҳуҷҷати меъёрию техникӣ оид ба истеҳсол ва истифодаи маводи биологию табобатӣ таҳия ва тасдиқ карда шудааст.